អដ្ឋកថា សមយសូត្រទី ៧

គប្បីជ្រាបវិនិច្ឆ័យក្នុងសមយសូត្រទី ៧ ដូច្នេះតទៅ បទថា សក្កេសុ ប្រែថា នាដែនសក្កៈ នេះ បានដល់ ជនបទមួយដែលជាទីនៅរបស់ រាជកុមារទាំងឡាយ មានឈ្មោះដែលខ្លួនបានហើយថា សក្កៈ ព្រោះអាស្រ័យ ពាក្យឧទានថា សក្យា វត ភោ កុមារា ប្រែថា អើហ្ន៎ កុមារទាំងឡាយ ពេញជាអង់អាច ដូច្នេះ ទើបលោកហៅជនបទនោះថាសក្កៈ តាមរុឡិសទ្ទស្រាស្ត ។ ក្នុងទីនេះ បានដល់ ក្នុងជនបទឈ្មោះថាសក្កៈនោះ ។ បទថា មហាវនេ ប្រែថា ក្នុងមហាវ័ន គឺបានដល់ ក្នុងព្រៃធំដែលជាប់នឹងព្រៃ ហិមពាន្ត ដែលកើតឡើងឯង ដោយធម្មជាតិ មិនមាននរណាដាំ ។ បទថា សព្វេហេវ អរហន្តេហិ ប្រែថា សុទ្ធតែជាព្រះអរហន្តទាំងអស់ គឺបានដល់ ព្រះអរហន្ត ដែលសម្រេចហើយក្នុងថ្ងៃដែលព្រះអង្គត្រាស់សមយសូត្រនេះ ឯង ។