អដ្ឋកថាធម្មបទសូត្រ

គប្បីជ្រាបវិនិច្ឆ័យក្នុងធម្មបទសូត្រទី ៩ ដូចតទៅនេះ បទថា ធម្មបទានិ គឺចំណែកនៃធម៌ ។ ក្នុងបទថា អនភិជ្ឈា ជាដើម គប្បីជ្រាប អនភិជ្ឈានដោយជាសត្រូវរបស់អភិជ្ឈា ។ អព្យាបទ ដោយជាសត្រូវ របស់ព្យាបាទ សម្មាសតិ ដោយជាសត្រូវរបស់មិច្ឆាសតិ គប្បីជ្រាប សម្មាសមាធិ ដោយជាសត្រូវរបស់មិច្ឆាសមាធិ ។ បទថា អនភិជ្ឈាលុ គឺមិនមានតណ្ហា ។ បទថា អព្យាបន្នេន ចេតសា សេចក្តីថា មានចិត្តមិនលះប្រក្រតីភាពអស់កាលទាំងពួង ។ បទថា សតោ ឯកគ្គចិត្តស្ស សេចក្តីថា បុគ្គលប្រកបដោយសតិ មានចិត្ត ពិតប្រាកដក្នុងអារម្មណ៍តែមួយ ។ បទថា អជ្ឈត្តំ សុសមាហិតោ សេចក្តី ថា បុគ្គលមានចិត្តតាំងមាំដោយល្អក្នុងខាងក្នុងពិតប្រាកដ ។ ទ្រង់ត្រាស់វដ្តៈ និងវិវដ្តៈទុកក្នុងព្រះសូត្រផង ក្នុងគាថាផង ។