អដ្ឋកថាបឋមអាហុនេយ្យសូត្រ

បឋមបណ្ណាសក គប្បីជ្រាបវិនិច្ឆ័យក្នុងបឋមអាហុនេយ្យសូត្រទី ១ នៃឆក្កនិបាត ដូចតទៅនេះ បទថា ឥធ ភិក្ខវេ ភិក្ខុ សេចក្តីថា ម្នាលភិក្ខុទាំងឡាយ ភិក្ខុ ក្នុងសាសនានេះ ។ បទថា នេវ សុមនោ ហោតិ ន ទុម្មនោ សេចក្តីថា រមែងជាបុគ្គលមិនត្រេកអរក្នុងឥដ្ឋារម្មណ៍ ដោយសោមនស្សដែលសហគតៈ ដោយរាគៈ ឬរមែងជាបុគ្គលមិនខូចចិត្ត ព្រោះអនិដ្ឋារម្មណ៍ដោយទោមនស្ស ដែលសហគតៈដោយទោសៈ ។ បទថា ឧបេក្ខកោ វិហរតិ សតោ សម្បជានោ សេចក្តីថា មិនដល់នូវភាពជាបុគ្គលព្រងើយដោយឧបេក្ខាដែល មិនមានញាណ ដោយមិនពិចារណាក្នុងមជ្ឈត្តារម្មណ៍ ឈ្មោះថា ជាបុគ្គល មានសតិសម្បជញ្ញៈ មានចិត្តជាកណ្តាលក្នុងអារម្មណ៍ ។ ក្នុងព្រះសូត្រនេះ ព្រះមានព្រះភាគត្រាស់ វិហារធម៌ជានិច្ចរបស់ព្រះខីណាស្រពហើយ ។