អរកានុសាសនីសូត្រ

ម្នាលភិក្ខុទាំងឡាយ កាលពីដើមមានគ្រូឈ្មោះអរកៈ ជាអ្នកធ្វើ នូវកំពង់ ជាទីទៅកាន់សុគតិភព ជាអ្នកប្រាសចាកតម្រេកក្នុងកាមទាំងឡាយ ។ ម្នាលភិក្ខុទាំងឡាយ ឯគ្រូឈ្មោះអរកៈ មានសាវ័កច្រើនរយ ។ គ្រូឈ្មោះអរកៈ រមែងសម្តែងធម៌ដល់សាវ័កទាំងឡាយ យ៉ាងនេះថា ម្នាលព្រាហ្មណ៍ ជីវិតពួក មនុស្សជារបស់តិច ខ្លី មានទុក្ខច្រើន មានសេចក្តីចង្ហៀតចង្អល់ច្រើន ។ អ្នក ទាំងឡាយត្រូវដឹង ត្រូវធ្វើនូវកុសល ត្រូវប្រព្រឹត្តនូវព្រហ្មចរិយធម៌ ដោយប្រាជ្ញា ព្រោះសត្វដែលកើតហើយ សុទ្ធតែស្លាប់ ។ ម្នាលព្រាហ្មណ៍ទាំងឡាយ ប្រៀបដូចតំណក់ទឹកសន្សើមលើចុងស្មៅ ដល់ព្រះអាទិត្យរះឡើង ក៏ត្រឡប់ បាត់វិញឆាប់រហ័ស ជារបស់មិនឋិតថេរ នៅយូរយារបានយ៉ាងណា ម្នាល ព្រាហ្មណ៍ ជីវិតរបស់ពួកមនុស្ស ជារបស់តិច ខ្លី មានទុក្ខច្រើន មានសេចក្តី ចង្ហៀតចង្អល់ច្រើន ប្រៀបដូចតំណក់ទឹកសន្សើម យ៉ាងនោះដែរ ។ អ្នកទាំងឡាយត្រូវដឹង ត្រូវធ្វើនូវកុសល ត្រូវប្រព្រឹត្តនូវព្រហ្មចរិយធម៌ ដោយប្រាជ្ញា សត្វដែលកើតហើយ សុទ្ធតែស្លាប់ ។ ម្នាលព្រាហ្មណ៍ ប្រៀបដូចភ្លៀង មាន តំណក់ដ៏ថ្លោសធ្លាក់ចុះមក ក្រពេញទឹកក៏ត្រឡប់បាត់ទៅវិញឆាប់ មិនឋិតថេរ យូរយារបាន យ៉ាងណាមិញ ម្នាលព្រាហ្មណ៍ ជីវិតរបស់ពួកមនុស្សជារបស់ តិច ខ្លី មានសេចក្តីទុក្ខច្រើន មានសេចក្តីចង្ហៀតចង្អល់ច្រើន ប្រៀបដូចជា ក្រពេញទឹក យ៉ាងនោះដែរ ។ អ្នកទាំងឡាយត្រូវដឹង ត្រូវធ្វើនូវកុសល ត្រូវ ប្រព្រឹត្តព្រហ្មចរិយធម៌ ដោយប្រាជ្ញា ព្រោះសត្វដែលកើតហើយ សុទ្ធតែ ស្លាប់ ។ ម្នាលព្រាហ្មណ៍ ប្រៀបដូចស្នាមគំនូសដំបងលើទឹក តែងត្រឡប់ បាត់ទៅវិញឆាប់ មិនឋិតថេរយូរយារបាន យ៉ាងណាមិញ ម្នាលព្រាហ្មណ៍ ជីវិតរបស់ពួកមនុស្ស ជ