អដ្ឋកថាមេត្តសូត្រ

ប្រយោជន៍នៃការតាំងនិក្ខេបបទ ឥឡូវនេះ ដល់លំដាប់ពណ៌នាអត្ថនៃមេត្តសូត្រ ដែលលើកឡើង ក្នុងលំដាប់ បន្ទាប់អំពីនិធិកណ្ឌសូត្រ ។ ក្នុងទីនេះ ខ្ញុំនឹងពោលប្រយោជន៍ នៃការតាំងមេត្តសូត្រនោះ ហើយបន្ទាប់អំពីនោះ គប្បីជ្រាបការចង្អុលបង្ញាញ បទទាំងនេះថា មេត្តសូត្រនោះ បុគ្គលណាពោល ពោលក្នុងកាលណា ពោលទីណា ពោលព្រោះហេតុដូចម្តេច ជម្រះនិទានហើយ ទើបនឹងពណ៌នា អត្ថនៃមេត្តសូត្រនោះ ។ ក្នុងមេត្តសូត្រនោះ ព្រោះទ្រង់ត្រាស់បុញ្ញសម្បទា មានទាន សីលជាដើម ដោយនិធិកណ្ឌសូត្រ ។ កាលបុគ្គលធ្វើមេត្តាក្នុងសត្វទាំងឡាយ បុញ្ញសម្បទានោះ រមែងមានផលច្រើន រហូតដល់អាចឲ្យសម្រេចពុទ្ធភូមិបាន ដូច្នោះ ទើបខ្ញុំលើកមេត្តសូត្រឡើងក្នុងទីនេះ ដើម្បីសម្តែងថា មេត្តសូត្រមានឧបការៈ ដល់បុញ្ញសម្បទានោះ ឬព្រោះហេតុដែលខ្ញុំ កាលសម្តែងកម្មដ្ឋានដែលអាច លះទោសៈ ដោយទ្វត្តឹសាការសម្រាប់ជនទាំងឡាយ ដែលរាប់អានព្រះសាសនា ដោយសរណៈ ហើយតាំងនៅក្នុងសីល ដោយសិក្ខាបទទាំងឡាយ នឹងអាច លះមោហៈដោយកុមារប្បញ្ញា ទើបសម្តែងថា ការប្រព្រឹត្តសរណៈជាដើមនោះ ជាមង្គល និងរក្សាខ្លួនឯងដោយមង្គលសូត្រ សម្តែងការរក្សាអ្នកដទៃ ដែល សមគួរដល់មង្គលនោះ ដោយរតនសូត្រ សម្តែងការឃើញភូតពួកខ្លះ ក្នុង បណ្តាភូតទាំងឡាយដែលពោលមកក្នុងរតនសូត្រ និងការវិបត្តិនៃជន ដែល ប្រមាទក្នុងបុញ្ញសម្បត្តិ ដូចដែលពោលហើយដោយតិរោកុឌ្ឌសូត្រ និងសម្តែង សម្បត្តិដែលជាបដិបក្ខចំពោះវិបត្តិដែលពោលក្នុងតិរោកុឌ្ឌសូត្រ ដោយនិធិកណ្ឌសូត្រ តែមិនទាន់បានសម្តែងកម្មដ្ឋាន ដែលអាចលះទោសៈ ដូច្នោះ ដើម្បីសម្តែងកម្មដ្ឋានដែលអាចលះទោសៈនោះ ទើបខ្ញុំលើកមេត្តសូត្រនេះ ឡើងក្នុងទីនេះ ។