អដ្ឋកថាមង្គលសូត្រ

ក្នុងមង្គលសូត្រទី ៤ មានពាក្យផ្តើមថា ឯវម្មេ សុតំ ដូច្នេះ ។ សួរថា សូត្រនេះ មានអត្ថុប្បត្តិហេតុដូចម្តេច ឆ្លើយថា សូត្រនេះ មាន អត្ថុប្បត្តិហេតុដូចតទៅនេះ បានឮថា ក្នុងជម្ពូទ្វីប មហាជនប្រជុំគ្នាក្នុងទីទាំងឡាយ មានទ្វារនគរ សណ្ឋាគារ និងទីប្រជុំជាដើមក្នុងទីនោះៗ សូម្បីឲ្យប្រាក់ និងមាសហើយ ក៏ បបួលគ្នានិងគ្នា ពោលពាហិរកថា មានរឿងលួចនាងសិតាជាដើម មានប្រការ ផ្សេងៗ រឿងនីមួយៗ ទម្រាំចប់ ក៏ត្រូវប្រើពេលអស់ ៤ ខែ ក្នុងទីប្រជុំនោះ មង្គលកថាក៏តាំងឡើងថា អ្វីហ្ន៎ ឈ្មោះថា មង្គល វត្ថុដែលឃើញហើយឬ ឈ្មោះថា មង្គល វត្ថុដែលស្តាប់ហើយឬ ដែលឈ្មោះថា មង្គល វត្ថុដែល ជ្រាបហើយឬ ឈ្មោះថា មង្គល តើអ្នកណាហ្ន៎ ស្គាល់នូវមង្គល ។ គ្រានោះ បុរសម្នាក់ឈ្មោះទិដ្ឋមង្គលិកពោលឡើងថា ខ្ញុំស្គាល់មង្គល របស់ដែលឃើញ ឈ្មោះថា ជាមង្គលក្នុងលោក រូបដែលសន្មតថាជាមង្គល ក្រៃលែង ឈ្មោះថា វត្ថុដែលឃើញហើយ គឺបុគ្គលខ្លះក្នុងលោកនេះ ភ្ញាក់ អំពីព្រលឹម ឃើញសត្វត្រចៀកកាំខ្លះ ឃើញដើមព្នៅជំទង់ខ្លះ ស្រីមានទម្ងន់ ខ្លះ កុមារទាំងឡាយដែលប្រដាប់តាក់តែងហើយខ្លះ ក្អមទឹកដែលពេញខ្លះ ត្រី ឆ្ពិនស្រស់ខ្លះ សេះអាជានេយ្យខ្លះ គោឧសភខ្លះ មេគោខ្លះ គោពណ៌ក្រហម ខ្លះ ឬឃើញរូបដទៃណា ដែលគេសន្មតថា ជាមង្គលក្រៃលែងបែបនេះ នេះ គេហៅថា ទិដ្ឋិមង្គល ។ ពាក្យរបស់បុរសនោះ មនុស្សពួកខ្លះក៏ទទួល មនុស្សពួកខ្លះក៏មិនទទួល ជនពួកណាមិនទទួល ជនទាំងនោះ ក៏ប្រកែកជាមួយនាយទិដ្ឋមង្គលិកនោះ ។ គ្រានោះ បុរសម្នាក់ឈ្មោះសុតមង្គលិក ពោលថា នែអ្នកដ៏ចម្រើន ឈ្មោះថា ចក្ខុនេះ ឃើញរូបដែលស្អាតខ្លះ មិនស្អាតខ្លះ ឃើញរូបដែលល្អ ខ្លះ មិនល្អខ្លះ ដែលគាប់ចិត្តខ្លះ ដែលម