សីហាថេរី

កាលពីដើម អាត្មាអញត្រូវកាមរាគបៀតបៀន ជាអ្នកមាន ចិត្តរវើរវាយ មិនលុះក្នុងអំណាចភាវនាចិត្ត ព្រោះធ្វើទុកក្នុងចិត្តមិនជាឧបាយ នៃប្រាជ្ញា ។ អាត្មាអញលុះត្រូវកិលេសទាំងឡាយរួបរឹតហើយជាអ្នកប្រព្រឹត្ត តាមសេចក្តីសំគាល់ក្នុងកាមថាជាសុខ ជាអ្នកលុះក្នុងអំណាចនៃចិត្តដែលប្រកបដោយ រាគៈ ក៏មិនបាននូវសេចក្តីស្ងប់ចិត្តឡើយ ។ អាត្មាអញទៅជាស្គមស្លេកស្លាំង ស្ហាប់សម្បុរប្រព្រឹត្តមកអស់ ៧ ឆ្នាំហើយ អាត្មាអញដល់នូវសេចក្តីទុក្ខ ក្រៃពេក មិនបានសេចក្តីសុខទាំងថ្ងៃទាំងយប់ ។ ព្រោះមិនមានសេចក្តីសុខ នោះ អាត្មាអញ ក៏បានកាន់ខ្សែចូលទៅក្នុងចន្លោះព្រៃ ( ដោយគិតថា ) អាត្មាអញចងកក្នុងទីនេះប្រសើរ ត្រង់វិលទៅកាន់ភេទថោកទាបវិញមិនប្រសើរ ឡើយ ។ អាត្មាអញបានធ្វើអន្ទាក់យ៉ាងមាំចងនឹងមែកឈើ ដាក់អន្ទាក់ត្រង់ក ក៏ស្រាប់តែចិត្តរបស់អាត្មាអញរួចស្រឡះ ។