មហាបជាបតីគោតមី

បពិត្រព្រះពុទ្ធមានព្យាយាម អ្នកខ្ពង់ខ្ពស់ជាងសព្វសត្វទាំងឡាយ ខ្ញុំសូមថ្វាយបង្គំព្រះអង្គដែលទ្រង់បានប្រោសខ្ញុំព្រះអង្គនិងជនដទៃច្រើន គ្នាឲ្យរួចចាកទុក្ខ ។ សេចក្តីទុក្ខទាំងពួងខ្ញុំព្រះអង្គបានកំណត់ដឹងហើយ តណ្ហា ជាដើមចម ( នៃទុក្ខ ) ខ្ញុំព្រះអង្គបានធ្វើឲ្យរីងស្ងួតហើយ មគ្គប្រកបដោយ អង្គ ៨ ខ្ញុំព្រះអង្គបានចម្រើនហើយនិរោធធម៌ខ្ញុំព្រះអង្គបានសម្រេចហើយ ។ មាតាបិតា បុត្ត បងប្អូន និងជីដូនជីតាដែលមានក្នុងកាលមុន ខ្ញុំព្រះអង្គក៏មិន ដឹងតាមពិតមិនបាន ( នូវទីពឹងក្នុងសមុទ្ទគឺសង្សារ ) បានអន្ទោលទៅ ( យក កំណើតផ្សេងៗ ) ព្រះមានព្រះភាគអង្គនោះ ខ្ញុំព្រះអង្គបានឃើញហើយ រាងកាយ ( របស់ខ្ញុំព្រះអង្គ ) នេះជាទីបំផុតហើយ ជាតិសង្សារអស់រលីងហើយ ឥឡូវនេះភពថ្មីមិនមាន ។ សូមព្រះអង្គទតនូវពួកសាវ័ក អ្នកមានព្យាយាម តឹងតែង មានចិត្តស្លុងទៅរកព្រះនិព្វាន មានព្យាយាមមាំជានិច្ច ជាអ្នកព្រមព្រៀង គ្នានេះជាការថ្វាយបង្គំចំពោះព្រះពុទ្ធទាំងឡាយ ។ ឱហ្ន៎ ព្រះនាងមាយា បានបង្កើតព្រះគោតមដើម្បីជាប្រយោជន៍ដល់ពួកជនច្រើនគ្នា ( ព្រោះថា ) ព្រះគោតម បានបន្ទោបង់នូវគំនរទុក្ខនៃពួកជន ដែលត្រូវព្យាធិ និងមរណៈចាក់ ដោត ។ មហាបជាបតិគោតមីថេរី ។