អដ្ឋកថាឯករំសិយត្ថេរាបទាន

អបទានរបស់ព្រះឯករំសិយត្ថេរ មានពាក្យផ្តើមថា នារទោ ឥតិ មេ នាមំ ដូច្នេះ ។ ព្រះថេរៈអង្គនេះ ជាអ្នកមានអធិការបានធ្វើហើយ ក្នុងព្រះពុទ្ធអង្គមុនៗ ធ្វើកុសលមកក្នុងជាតិជាច្រើន ក្នុងកាលនៃព្រះមានព្រះភាគព្រះនាមអត្ថទស្សី កើតក្នុងត្រកូលព្រាហ្មណ៍ មានឈ្មោះថា កេសវៈ ដល់នូវភាពជាអ្នកដឹងក្តី ហើយ លះបង់ការគ្រប់គ្រងផ្ទះ ចេញបួស ថ្ងៃមួយ បានស្តាប់ព្រះធម្មទេសនា របស់ព្រះសាស្តា មានចិត្តជ្រះថ្លា ផ្គងអញ្ជលី កើតនូវបីតិដ៏ខ្លាំងក្លាហើយ ចៀសចេញទៅ ។ កុលបុត្តនោះ តម្កល់ជីវិតនៅដរាបដល់អស់អាយុ ទើប ធ្វើកាលកិរិយាហើយ អស់ជីវិតដោយសោមនស្សនោះឯង បានទៅកើតក្នុង ទេវលោក សោយទិព្វសម្បត្តិក្នុងទេវលោកនោះហើយ បានកើតក្នុងមនុស្សលោក សោយសម្បត្តិក្នុងមនុស្សលោកនោះទៀត ក្នុងពុទ្ធុប្បាទកាលនេះ កើតក្នុងផ្ទះមានត្រកូលមួយកន្លែង លុះចម្រើនវ័យហើយ ជ្រះថ្លាក្នុងព្រះសាស្តា បួសហើយ មិនយូរបុន្មាន ក៏បានជាព្រះអរហន្ត ។ ក្នុងកាលតមក ព្រះថេរៈរពឫកដល់កុសលកម្មដែលខ្លួនធ្វើ កើតសោមនស្ស កាលប្រកាសអបទានដែលប្រព្រឹត្តមកក្នុងកាលមុន ទើបពោលពាក្យ ថា នារទោ ឥតិ មេ នាមំ ដូច្នេះជាដើម ។ បណ្តាបទទាំងនោះ បទថា នារទោ មានវិគ្គហៈថា ឈ្មោះថា នារទ ព្រោះមិនមានល្អងធូលី មន្ទិល និងព្រោះមានរាងកាយស្អាតអំពីកំណើត ទើបបានទទួលឈ្មោះអំពីត្រកូលថា នារទៈ ព្រោះផ្លាស់ ជ អក្ខរៈជា ទ អក្ខរៈ ។ បទថា កេសវោ សេចក្តីថា ជនទាំងឡាយអ្នកដឹង រមែងស្គាល់ខ្ញុំថា កេសវៈ គឺនារទកេសវៈ ព្រោះខ្ញុំ កើតមកក្នុងកិសវច្ឆគោត្រ ។