អដ្ឋកថារូបរូបាវចរារូបាវចរន្តិកថា

ឥឡូវនេះ នឹងពណ៌នាអំពីរូបជារូបាវចរ និងអរូបាវចរតទៅក្នុង រឿងនោះ ជនទាំងឡាយណា មានលទ្ធិ ដូចលទ្ធិរបស់និកាយអន្ធកៈ ទាំងឡាយថា ព្រោះរូបដែលកើតឡើង ព្រោះធ្វើកម្មដែលជាចំណែកកាមាវចរ រមែងជាកាមាវចរ ព្រោះហេតុនោះ រូប ក៏គប្បីជារូបាវចរ និងអរូបាវចរ ព្រោះ ធ្វើកម្មដែលជាចំណែករូបាវចរ និងអរូបាវចរ ដូច្នេះ ពាក្យសួររបស់សកវាទី ថា អត្ថិ រូបំ រូបវចរារូបវចរំ សំដៅដល់ជនទាំងនោះ ។ ពាក្យឆ្លើយទទួល ជាពាក្យរបស់បរវាទី ។ ពាក្យដ៏សេសក្នុងទីនេះ មានន័យតាមដែលពោល ហើយខាងដើមនោះឯង ។